تاند (دوشنبه، د مرغومي/ جدي ۱۰ مه) د طالبانو حکومت وایي چې په تېرو درې کلونو کې یې د یو شمېر ښځو په ګډون شاوخوا ۳۰۰ کسان د انساني قاچاق په جرم نیولي او سزاوې یې ورکړي دي.
د طالبانو مشر شاوخوا لس ورځې مخکې په یوه فرمان کې د کورنیو چارو وزارت ته امر وکړ چې د انساني قاچاق مرکزونه وپیژني، وتړي، او تورن کسان نظامي محکمې ته معرفي کړي.
د دې کسانو لپاره له یو څخه تر درې کلونو پورې د بند جزا ټاکل شوې ده.
د طالبانو د کورنیو چارو وزارت ویاند عبدالمتین قانع بيبيسي ته ویلي چې د انساني قاچاق پر وړاندې د مبارزې لپاره څلور کلنه ستراتیژي جوړه شوې ده.
ښاغلي قانع وویل چې د انساني قاچاق شبکې له افغانستان څخه بهر ریښې لري او معتبر شواهد د ایران او پاکستان چارواکو ته سپارل شوي دي:
“هغه مجرمان چې نیول شوي، له بهر سره یې اړیکې درلودې او مدیریت یې له هغه ځایه کېده. سربېره پر دې، چې موږ د دوی موقعیت تثبیت کړ، دوی په بهر کې ول. د دوی غږیز شواهد، پیسې او ټول اسناد په رسمي ډول له ګاونډیو هېوادونو سره شریک شوي دي، او هیله لرو چې د ټولو اړخونو په مرسته، دې مبارزې ته دوام ورکړو.”
ښاغلي قانع زیاته کړه چې د طالبانو د کورنیو چارو وزیر د ګاونډیو هېوادونو له چارواکو سره په کتنو کې د انټرپول د همکارۍ غوښتنه هم کړې ده. له افغانستان څخه د انسانانو د قاچاق اصلي لارې پر ایران او پاکستان سپرې دي.
ملګري ملتونه وایي چې په ۲۰۲۴ کال کې د نړۍ په کچه د انسانانو قاچاق ۱۴ سلنه زیات شوی او د دې لویې وجې فقر، جګړه، او د اقلیم بدلونونه دي. ماشومان او ځوانان د دې ستونزې تر ټولو زیانمنه ډله ده.
د انساني قاچاق د مخنیوي په اړه د طالبانو د مشر د شپږ مادهییز فرمان په باب د طالبانو د حکومت د ویاند مرستیال، حمدالله فطرت، وویل: “دې فرمان دفاع وزارت ته هم امر کړی چې په پولو کې د انساني قاچاق مخه ونیسي او د استخباراتو اداره دې په استخباراتي برخه کې همکاري وکړي.”
که څه هم لا معلومه نه ده چې له انساني قاچاق سره د مبارزې لپاره د طالبانو هڅې په عمل کې څومره اغېزمنې دي، خو لا هم په افغانستان کې داسې شبکې فعالې دي چې ځوانان د بهر ته تګ هڅوي.
هغه لارې چې قاچاقبران یې کاروي، ستونزمنې دي او د قربانیانو د ناوړه چلند، ناوړه ګټه اخیستنې، او شکنجې راپورونه ورکړل شوي دي.
د نړیوال مهاجرت سازمان د راپور له مخې، افغانستان له سوریې وروسته په نړۍ کې تر ټولو ډېر کډوال لري.