تاند ( شنبه د جدي لومړۍ) د ښځو او بشر حقونو برخه کې د امریکا ځانګړې استازې رینا امیري وايي، چې نړیواله ټولنه باید له طالبانو سره په هر ډول تعامل کې بشر حقونو په ځانګړې توګه د ښځو او نجونو حقونو ته لومړیتوب ورکړي.
اميري زیاته کړې چې د ډیپلوماټیکو او اقتصادي اړیکو پرمختګ باید د هغو بنسټیزو اقداماتو سره تړلی وي، چې د ښځو او نجونو پر وړاندې روانې تګلارې له منځه يوسي.
دا څرګندونې داسې مهال کېږي، چې د امريکا بهرنيو چارو وزیر انتوني بلېنکن هم په یوه خبرپاڼه کې د افغان ښځو او نجونو پر وړاندې د وضع شويو محدوديتونو د ژر لرې کېدو غوښتنه کړې ده.
نوموړي افغان ښځې او نجونې د یوه باثباته، سولهییز او پرمختللي افغانستان لپاره اساسي برخه بللې ده.
په ورته وخت کې د افغانستان پخوانی ولسمشر حامدکرزي هم په هېواد کې د ښوونځیو او پوهنتونونو د پرانیستلو لپاره د نجونو د غږ ملاتړ کړی او ویلي دي، چې د نجونو له تعلیم پرته افغانستان هیڅکله یوه روښانه راتلونکی نشي درلودی.