تاند ( چهارشنبه د لیندۍ/ قوس ۲۸مه) د طالبانو کورنیو چارو وزارت سرپرست له خلکو غوښتي،چې نور دې د فاتحې په نامه پکتیا ته زحمت نه ګالي.
په دې اړه خپره شوې اعلامیه کې سراج الدین حقاني ویلي، چې د فاتحې مراسم پای ته رسېدلي او هېوادوال دې په دې موخه پکتیا ته “زحمت نه ګالي”.
حقاني د له خپل رهبر، رییس الوزرا، کابینې غړو او ډیپلوماټانو ترڅنګ له ټولو هغوی مننه کړې چې د کډوالو چارو وزیر خلیل الرحمن حقاني په تړاو یې له دوی له کورنۍ سره یې خواخوږي ښودلې ده.
تازه نن پخوانی ولسمشر حامد کرزی هم پکتیا ته د فاتحې او سراج الدین حقاني سره د خواخوږۍ په پار یاد ولایت ته تللی وو.
د طالبانو د کډوالو سرپرست وزیر یوه اونۍ وړاندې د وزارت په انګړ کې په یوه ځانمرګي برید کې ژوند وبایله.