تاند ( سه شنبه د لیندۍ/ قوس ۲۷مه) د طالبانو د حکومت د کور او ښار جوړولو وزارت خبر ورکړی، چې د کابل ښار دارالامان سیمه کې یې د بهرنیو ډیپلوماټانو لپاره یې د ښارګوټي جوړولو توپوګرافي سروې ترسره کړه.
یاد وزارت ویلي،چې دغه ښارګوټی د طالبانو د بهرنیو چارو وزارت په غوښتنه ۳۷۱.۵ جريبه ځمکه کې جوړېږي.
دا لومړی ځل دی، چې هېواد کې د بهرنیو ډيپلوماټانو لپاره ښارګوټی جوړېږي.
د دې ښارګوټي د جوړېدو خبر داسې مهال خپرېږي، چې دا مهال دارالامان کې د نېله باغ ښارګوټي د جوړولو چارې هم دوام لري.
د طالبانو د ریاست الوزرا اقتصادي کمېسیون پر ۱۱ بېلابېلو مسایلو پرېکړه کړې
د دې ترڅنګ د طالبانو د حکومت د ریاست الوزرا اقتصادي کمیسیون په یوه خبرپاڼه کې ویلي،چې د مولوي هبة الله په مشرۍ د اقتصادي کمیسیون ځانګړې غونډه وشوه، چې پکې پر ۱۱ مهمو بېلابېلو مسایلو پرېکړې وشوې.
په دغه غونډه کې پرېکړه شوې، چې د ښاري پلان له مخې دې خلکو ته پخپلو شخصي ځمکو کې ودانیزې چارې اسانه شي.
د بلې پرېکړې له مخې اقتصادي کمیسیون ته دنده وسپارل شوه، چې په لویو لارو کې پر دولتي ځمکو ښځو او سړو لپاره جوماتونه، اودس ځایونه، هوټلونه، تیل ټانکونه او د مسافرو د اړتیا وړ ځایونه ودان کړي.
دغه راز د برېښنا، کانونو، غصب شویو ځمکو، روغتیا او ګڼو نورو مسایلو په اړه هم مهمې پرېکړې وشوې.