تاند (جمعه، د لیندۍ/ قوس ۲۳ مه) ګوګل کمپنۍ د مصنوعي ذهانت (AI) له نوې نسل ټکنالوژۍ سره پر وړاندې روانه ده.
ګوګل د چهارشنبې په ورځ د مصنوعي ذهانت له یوې بلې څپې، چې هدف یې د انسانانو له لوري د کېدونکو کارونو او فکر کولو اسانه کول دي، پرده پورته کړه.
د ګوګل د AI نوی نسل د “جمینای” تر چتر لاندې وړاندې کېږي، چې یو کال وړاندې معرفي شوی و.
ګوګل د “جمینای ۲.۰” خپرېدل د داسې AI ایجنټانو لپاره یو نوښت ګڼي چې د ځیرک یا سمارټفون له لارې ښودل شوي انځورونه تعبیر کړي، بېلابېلې ستړې کوونکې چارې ترسره کړي، هغه خبرې اترې په یاد وساتي چې کاروونکي یې له خلکو سره کوي، د ویډیو ګیم لوبغاړو سره د ستراتېژۍ په جوړولو کې مرسته وکړي، او حتی د آنلاین لټون دندې ترسره کړي.
د ګوګل اجرایي مشر، سندر پچای، په یوه بلاګ کې وړاندوینه وکړه چې په “جمینای ۲.۰” کې شته ټکنالوجي به ستاسو د شاوخوا نړۍ په اړه ډېره پوه شي، څو ګامونه مخکې به فکر وکړي او ستاسو تر څارنې لاندې به ستاسو په استازیتوب اقدامات وکړي. دا هغه هدف دی چې د نورو سیالانو، لکه د OpenAI له خوا جوړ شوي ChatGPT او د مایکروسافټ په څېر د صنعت د لویانو له خوا هم تعقیب کېږي، چې د ورته وسیلو په پراختیا بوخت دي.
شته ځانګړتیاوې
د ګوګل وروستۍ AI ټکنالوجي به په پیل کې د ازمېښتي ډلو او هغو پیرودونکو ته ځانګړې وي چې د “جمینای اډوانسډ” لپاره پیسې ورکوي، خو ځینې ځانګړتیاوې به د دې لټون انجن او ګرځنده اپلیکیشنونو له لارې وړاندې شي.
ګوګل پلان لري چې راتلونکی کال په پراخه پیمانه شیان راوباسي چې پکې دا ټکنالوژي به د ګوګل په وړیا محصولاتو لکه کروم براوزر، ډیجیټل نقشې، او یوټیوب کې هم څرګنده شي.