تاند (دوشنبه، د لیندۍ/ قوس ۱۲ مه) د ملګرو ملتونو امنیت شورا روانه میاست (دسمبر) د افغانستان په اړه غونډه جوړوي. دې شورا ویلي چې په دې غونډه کې به د افغانستان وضعیت، په تېره بیا د بشري او انساني حقوقو وضعیت، وڅېړل شي.
د امنیت شورا د ویبپاڼې د خپرو شوو معلوماتو له مخې، په دې ناسته کې به د کلیدي مسوولانو له لوري راپورونه وړاندې شي، او بیا به غیرعلني مشورې ترسره شي.
روزا اوتونبایوا، چې د ملګرو ملتونو د سرمنشي ځانګړې استازې او په افغانستان کې د یوناما مشره ده، د اصلي راپور وړاندې کولو مسوولیت پر غاړه لري.
همداراز، د اکوادور سفیر او د افغانستان د ۱۹۸۸ د بندیزونو کمیټې مشر، اندریس مونتالوو سوسا، د ملګرو ملتونو د بشري چارو د همغږۍ دفتر استازي، او د ځینو مدني ټولنو استازي به هم په دې ناسته کې ګډون وکړي.
په دې غونډه کې تمه کېږي چې امنیت شورا د ۱۹۸۸ د بندیزونو کمیټې د څارنې ټیم مأموریت وغځوي. دا کمیټه د طالبانو او اړوندو ډلو د اشخاصو او ادارو په اړه د بندیزونو د څارنې مسوولیت لري.
پر دوی بندیزونه په داسي حال کې غځول کېږي چې افغانستان د بشري حقونو د سرغړونو په برخه کې له نړیوالو فشارونو سره مخامخ دی.