تاند( دوشنبه د لیندۍ/قوس ۵مه) د طالبانو د حکومت د عامې روغتیا وزارت، نن دوشنبه د لېندۍ ۵مه په کابل، ننګرهار، لغمان، کنړ، نورستان، کندهار، هلمند، زابل، اروزګان او کندز ولایتونو کې د پولیو ضد واکسین کمپاین د پیل خبر ورکړ.
د دغه وزارت ویاند شرافت زمان وایي، چې دا کمپاین به دری ورځې دوام وکړي.
نوموړی زیاتوي، چې د دې کمپاین په ترڅ کې به له پنځو کلونو کم عمره ۵.۳ ملیونه ماشومان واکسین شي.
شرافت زمان له قومي مشرانو او عامو خلکو غوښتي چې د پولیو له واکسیناتورانو سره مرسته وکړي څو کمپاین په ښه ډول عملي شي.
پاکستان او افغانستان د نړۍ یوازیني هېوادونه دي چې پکې لا هم د پولیو وایرس موجود دی.
افغانستان کې سږ کال تر اوسه ۲۳ ماشومان ګوزڼ وهلي دي چې زياتره يې د هلمند او کندهار ولایتونو اوسېدونکي دي.
بل لورته بیا په پاکستان کې د ګوزڼ د پېښو شمېر تر ۵۲ رسېدلی دی.