تاند – د یوې نوې څېړنې پایلې ښيي چې هره ورځ د غوزانو او نورې وچې مېوې خوړل د منځني عمر لرونکو خلکو او حتی ځینې وخت د بوډاګانو د الزایمر یا دماغي زوال د خطر د کمېدو سبب کېږي.
د نړیوالو څېړونکو یوه ډلې د بریتانیا له ۵۰,۳۰۰ لویانو څخه چې اکثره یې د ژوند په پنځوسمه لسیزه کې وو، وغوښتل چې د وچې مېوې د استعمال په اړه یوه پوښتنپاڼه ډکه کړي. دوی دغه ګډونوال د اوو کلونو لپاره تر څارنې لاندې ونیول ترڅو معلومه کړي چې ایا هغوی د دماغي زوال ښکار کېږي که نه.
له دې ډلې څخه په شاوخوا ۱,۴۰۰ کسانو کې د دماغي زوال پېښې ثبت شوې. څېړونکو د عمر، جنسیت، د بدن د وزن شاخص، زدهکړو او د ژوند د طرز په څېر فکتورونه په پام کې ونیول او څرګنده یې کړه چې د وچې مېوې ورځنی مصرف د الزایمر خطر ۱۲ سلنه کموي.
د هغو کسانو لپاره چې بې مالګې وچه مېوه یې خوړله او هره ورځ یې د شاوخوا ۴۰ ګرامه په اندازه مصرفوله، دا ګټې نورې هم زیاتې وې، او د هغوی لپاره د الزایمر خطر ۱۶ سلنه کم شوی و.
دا موندنې د روان کال په سپټمبر میاشت کې د Geroscience په ژورنال کې خپرې شوې.
له ډېرې مودې راهیسي څېړونکو ته څرګنده شوې چې خراب خوراک د دماغي زوال د زیاتېدو له خطر سره تړاو لري.
د منځني عمر یا پوخ عمر په موده کې د وزن زیاتوالی، د شکرې ناروغي او لوړ کلیسټرول په هغو عواملو کې شامل دي چې د لنسیټ ساینس کمېسیون په وینا د الزایمر د چټکېدو سبب بللي دي او ویلي چې انسانان د خپل ژوند په طریقه او خوړو کې د بدلون په راوستلو سره د دغو عواملو مخه نیولی شي.
متخصصان وړاندیز کوي چې د مدیترانې، د DASH، او MIND په څېر خوراکي رژیمونه چې په مېوو، سبزیجاتو، د غنمو په بشپړو دانو او سالمو غوړو کې پرېمانه دي، ممکن د دماغ د روغتیا لپاره غوره انتخاب وي.
DASH رژیم د وینې فشار د کمولو لپاره ډیزاین شوی او پر مېوو، سبزیجاتو، بشپړو دانو او کمو غوړو پروټینونو ټینګار کوي. MIND رژیم د DASH او مدیترانې رژیمونو ترکیب دی چې د دماغي ناروغیو لکه الزایمر د مخنیوي لپاره ګټور دی او په شنو پاڼو لرونکو سبزیجاتو، بیرو (مېوه)، توتو، غوړو کبانو او وچې مېوې تمرکز کوي.
وچه مېوه د دغو درې واړو خوراکي پروګرامونو یوه مهمه برخه ده.
د هسپانیا څېړونکو تېر کال په Nutrients ژورنال کې ولیکل چې وچه مېوه “په مغذي موادو کې بډایه خواړه دي چې له نااشباع او څو- نااشباع غوړو اسیدونو، فایبر، د B ګروپ ویټامینونو، غیرسوډیمي معدني موادو او قوي بیواکټیو پوليفینولونو څخه ډکه ده او دا د اعصابو او دماغ له ساتنې سره مرسته کوي.