تاند (چهارشنبه، د عقرب ۱۶ مه) سره له دې چې په افغانستان کې د کوکنارو کښت په رسمي ډول منع شوی دی، د ملګرو ملتونو له مخدره موادو او جرمونو سره د مبارزې دفتر په خپل تازه راپور کې ویلي چې د ۲۰۲۴ کال په اوږدو کې د کوکنارو کر ۱۹ سلنه زیات شوی دی.
د ملګرو ملتونو په وینا، تېر کال په افغانستان کې پر ۱۰،۸۰۰ هکتاره ځمکه کوکنار کرل شوي وو، خو دا شمېره سږ کال ۱۲،۸۰۰ هکتارو ته لوړه شوې ده. راپور، چې د چهارشنبې په ورځ خپور شو، څرګندوي چې په شمال ختیځو سیمو کې د کوکنارو کښت زیات شوی او د تریاکو د هر کیلو بیه ۷۳۰ ډالرو ته رسېدلې ده.
د ملګرو ملتونو دفتر ټینګار کړی چې باید د افغان بزګرانو ملاتړ وشي او اقتصادي فرصتونه ورته برابر کړل شي څو له غیرقانوني بازارونو څخه ځان خلاص کړي.
د دې دفتر اجرايي مدیرې، غاده والي، وویل: “که څه هم د کوکنارو کښت په افغانستان کې کم پاتې دی، موږ مسوولیت لرو چې افغان بزګرانو ته د دوامدار عاید سرچینې برابرې کړو.”
هغې زیاته کړه چې د افغانستان خلک له جدي مالي او بشري ستونزو سره مخامخ دي او بدیل عایداتو ته اړتیا لري.
راپور دا هم په ګوته کوي چې د کوکنارو د کښت جغرافیه له جنوب لویدیځ څخه، چې په دودیز ډول د کوکنارو د کر مهم مرکز ګڼل کېده، شمال ختیځو ولایتونو ته انتقال شوی، چېرته چې ۵۹ سلنه کوکنار کرل شوي دي.
د دې بدلون معنا دا ده چې د ۲۰۲۳ کال پرتله په شمال ختیځو ولایتونو کې د کوکنارو کښت ۳۸۱ سلنه زیات شوی دی.