تاند (جمعه، د عقرب ۴ مه) د ننګرهار ملي راډیو او ټلویزیون خبریال د عزیز احمد وفا، د کورنۍ یو غړیو تایید کړه چې وفا د طالبانو له زندان څخه خوشې شوی دی.
د طالبانو استخباراتو څه باندې ۳ میاشتې پخوا ښاغلی وفا بې له کوم دلیله ونیوه او تراوسه یې په بند کې ساتلی و.
د خبریالانو د خوندیتوب بنسټ د روان کال په اسد میاشت کې اعلان وکړ چې د طالبانو استخباراتو عزیز احمد وفا په ننګرهار کې د نامعلومو دلایلو له مخې نیولی دی.
د وفا کورنۍ وایي چې هغه د طالبانو د استخباراتو له لوري شکنجه شوی دی.
طالبانو په تېرو څلورو میاشتو کې شاوخوا ۹ خبریالان پرته له مشخصو دلایلو نیولي دي، ځینې یې خوشې کړي او ځینې نور لا هم د دې ډلې په بند کې دي.
د خبریالانو مدافع ټولنو په ځلونو پر طالبانو د خبریالانو د پر له پسې نیونو او ځورونو په خاطر نیوکې کړي دي.