تاند ( سه شنبه د عقرب ۱) د طالبانو د حکومت د اوبو اوانرژۍ وزارت وايي؛ د دې وزارت د انجنیري خدمتونو او د اوبو د اسانتیاوو عمومي ریاست د سروې او ډیزاین تخنیکي ډلې د زردالو اوبو بند تخنیکي سروې پيل کړه.
یاد بند د غزني ولایت په قره باغ ولسوالۍ کې موقعیت لري.
د سرچینې په وینا د دغه بند له جوړېدو سره به ۶۰ میلیون مټر مکعب اوبه زېرمه او زرګونه جریبه کرنیزه ځمکه خړوبه شي.
باور دا دی، چې افغانستان کې حاکمو حکومتونو د اوبو مدیریت ته څنګه چې لازمه ده کار نه دی کړی او که کار شوی وای ښايي په هېواد دننه هېڅ شاړه ځمکه بې اوبو نه وای پاتې.
د کرنیزو پوهانو په وینا که د افغانستان اوبه مهار شي او د برښنا ترڅنګ ترې په کرنه کې کار واخیستل شي نو په اقتصادي برخه کې به ډېر ژر افغانستان په ځان بسیا او د کرنې برخه کې د اوبو د کمښت ستونزه حل شي.