تاند (سې شنبه، د میزان ۲۴ مه) د بلوچستان د ازادۍ پوځ (BLA) په تربت کې د یوې چاودنې په ترڅ کې د پاکستان د پوځ دوه عسکر وژلي دي.
د بلوچستان د ازادۍ پوځ جنګیالیو د کیچ په تربت سیمه کې د پاکستاني پوځ د نقلیه وسایطو د کاروان په لاره کې له لیرې په کنټرولېدونکي بم برید وکړ.
د بلوچستان د ازادۍ پوځ له ادعا سره سم، په دې برید کې دوه پوځیان ځای وژل شوي، او لږ تر لږه درې نور ټپیان شوي دي.
تر چاودنې وروسته، د پاکستان پوځ د پېښې ځای محاصره کړ او هڅه یې وکړه چې مرګ ژوبلې پټې کړي.
د بلوچستان د ازادۍ پوځ وايي، د دې برید پړه پر غاړه اخلي او په کلکه وایي چې د دوی عملیات به تر هغه وخته دوام لري چې د پاکستان پوځ له بلوچستان څخه په بشپړ ډول وځي.