تاند ( پنج شنبه، د میزان ۱۹مه) د طالبانو حکومت د کازو پټرولیم وزارت د ریاست الوزراء اقتصادي مرستیال ملاعبدالغني برادر په شتون کې د شاوخوا یو میلیارد ډالرو په ارزښت د فاریاب ولایت د طوطي میدان د ګازو اکتشاف او استخراج تړون لاسلیک کړ.
دغه تړون د طالبانو د کانونو او پټرولیم وزارت او ازبکستاني کمپنۍ ترمنځ لاسلیک شو.
طالب چارواکي وایي د دې تړون له مخې قراردادي کمپنۍ به په لومړي کال د ۱۰۰ملیون ډالره او ۱۰ کلونو په جریان کې یو میلیارد ډالره پانګونه کوي.
د یادې اندازې د پانګونې له استخراج شوو ګازو به لومړیو دوو کلونو کې ۱۰۰میګاواټه ګازي برېښنا هم تولید شي.
د فاریاب ولایت طوطي میدان د ګازو زېرمې شاو خوا ۷ زره کیلومټره مربع مساحت لري، چې په استخراج به یې تر ډېره د هېواد د ګازو اړتیاوې هم پوره شي.