تاند ( پنج شنبه د میزان ۱۹مه) د پښتون ژغورنې غورځنګ مشر منظور پښتین له پښتنو غوښتي چې له جرګې په شا نهشي.
نوموړي نن په خیبر کې د جرګې لپاره په جوړ شوي ځای کې خپلو پلویانو ته د وینا پرمهال دا څرګندونې وکړې.
پښتین وایي د جرګې د غړو له خبرو د پاکستان حکومت دومره وارخطا دی، چې په وینا یې که لاس پورته کړي نو ټول به د کراچۍ سمندر ته ځانونه غورځوي.
پښتین زیاته کړې، د پښتنو دا قومي جرګه چې هره پرېکړه وکړي دا به يې عملي کوي.
د وروستیو مالوماتو له مخې نن د خیبر په میدان کې په زرګونه کسان راټول شوي چې، سبا د اکټوبر ۱۱مه د پښتنو قومي عدالت جرګه کې برخه واخلي.
تېره ورځ د خیبر په ریګي للمه سیمه کې د پاکستان د پوځ لهخوا د جرګي پر ګډونوالو د ډزو په پایله کې ۳ تنه ووژل شول او ۱۰ نور ټپیان شول.
دا په داسې حال کې ده چې د پاکستان د کورنیو چارو وزیر محسن نقوي هم په سبانۍ جرګه کې د موازي حکومت د اعلان وېره ښودلې.
نوموړي ویلي، چې د جرګې خلاف نه دی خو په خبره یې په زرګونه کسان راټولیدل د موازي حکومت د اعلان په معنی دی.