تاند ( چهارشنبه، د میزان ۱۱مه) پاکستاني پولیس وایي، د پنجاب ایالت په سیالکوټ سیمه کې په یو موټر وسله والو بریدو کړی دی.
پاکستاني رسنۍ ډان نیوز د پولیسو له قوله لیکلي، چې د ډزو له امله شاوخوا ۷ تنه وژل شوي دي.
سرچینه زیاتوي، چې دا پېښه سه شنبه د سیالکوټ په مالوکي بهلي سیمه کې رامنځته شوې ده، چې په پېښه کې وسله والو کسانو پر روان موټر ډزې کړې دي.
پولیسو د وسله والو کسانو د هویت په اړه څه نه دي ویلي او نه هم کومې وسله والې ډلې د دې برید مسوولیت منلی دی.
په دې وروستیو کې په پاکستان کې امنیتي وضعیت داندېښنې وړ بلل کېږي او عام خلک پاکستانی حکومت د امنیت په ټینګښت کې پاتې بولي
دا په داسې حال کې ده، چې د پښتون ژغورنې غورځنګ مشر منظور پښتین بیا په خپله ايکس پاڼه لیکلي، چې پولیسو د اکتوبر ۱۱مې غوندې پر انتظامیه ډلې برید کړی او یو شمېر یې ټپيان کړي دي.