تاند (یکشنبه، د میزان ۸ مه) د ژغورنې ټیمونو نن (یکشنبې) سهار د هسپانیا کنري ټاپوګانو کې د ایل هیرو ټاپو ته نژدې په اوبو کې د شاوخوا ۴۸ بې درکه شویو غیرقانوني پناه کډوالو لټون پیل کړ.
په دې سیمه کې د کډوالو د بیړۍ له ډوبېدو وروسته تراوسه د یوه ماشوم په ګډون د ۹ تنو مړي موندل شوي دي.
ژغورونکو وتوانیدل چې د دغو کډوالو، چې هڅه یې کوله ځانونه له افریقا څخه هسپانیا ته ورسوي، ۲۷ تنه وژغوري. ویل کیږي چې په کښتۍ کې ۸۴ تنه سپاره وو.
د هسپانیايي چارواکو په وینا، په مهاجرو کې د مالي، موریتانیا او سینیګال اتباع شامل دي.
د هیپانیا ژغورونکو تېره شپه څه باندې دوولس بجې، د مرستې د غوښتنې پیغام ترلاسه کړ خو کله چې ژغورونکي د پېښې ځای ته نژدې کېدل، بیړۍ ډوبه شوه.
په کنري ټاپوګانو کې د هسپانیا د حکومت د استازي انسلمو پستانا په وینا، دا کډوال لږترلږه دوې ورځې بې خوړو د اوبو پر سر پاته شوي وو. د پستانا په باور باد او د هوا تتوالی سبب شو چې د ژغورنې عملیات پڅ پرمخ لاړ شي.
له بلې خوا تېره شپه د غیرقانوني کډوالو درې نورې بیړۍ، چې ۲۰۸ تنه پکې سپاره وو، کنري ټاپوګانو ته ورسیدې.