تاند (دوشنیه، د میزان ۲ مه) د ایران د پوځ د قوماندان په وینا، ایران له افغانستان سره د خپلې پولې په اوږدو کې تر لسو کیلومترو زیات دېوال جوړ کړی دی.
د ایران د پوّ یوه قوماندان نوزار نعمتي نن وویل چې د سرحدی دیوال د جوړولو چارې ۵۰ کیلومتره نورې هم روانې دي. هغه وویل، اوس مهال شاوخوا ۲۰ ساختمانی واحدونه د افغانستان او ایران د پولې په اوږدو کې د زیربناوو او د دیوال پر جوړولو کار کوي، او د دې پروژې مسوولیت د ایران پوځ ته سپارل شوی دی.
نعمتي زیاته کړه، «موږ د افغانستان د پولې له شمالۍ برخې څخه د پولې پیاوړي کول پیل کړل، او د پروژې د څارنې لپاره یو همغږی واحد جوړ شوی دی. دا پروژه، چې یوه برخه یې د ایران پوځ اجرا کوي، په منظم ډول پرمختګ کوي.»
دغه قوماندان ټینګار وکړ چې د پولې د قوي کولو موخه د امنیت پیاوړتیا او د قاچاق مخنیوی دی.
د ده په وینا، د پولې خوندي کول به د ایران په اقتصادي وده کې مرسته وکړي او د پولې هاخوا دقیق کنټرول ته به اجازه ورکړي.