تاند (شنبه، د سنبلې ۲۴ مه) د جرمني د نړیوالې همکارۍ ادارې (GIZ) څلور کارکوونکي په افغانستان کې له څه کم یو کال بنده وروسته خوشې شوي دي.
د جرمني دوجې ویلې رسنۍ د خپل هیواد د ولټ ام ځایتونګ ورځپاڼې په قول نن راپور ورکړ چې دا څلور تنه خوشي شوي دي.
ایم څایتونګ ورځپاڼې ویلي چې امنیتي سرچینو د دې کسانو د خوشي کېدو حال ورکړی دی.
طالبانو په دې اړه څه نه دي ویلي.
د تېر کال په نوومبر میاشت کې جرمني اعلان وکړ چې د GIZ ادارې څلور ځايي کارکوونکي یې په افغانستان کې د طالبانو له خوا نیول شوي دي.
د جرمني د اقتصادي همکارۍ او پراختیا وزارت یوه ویاند ویلي وو، چې د دغو کسانو د نیول کېدو د علت په هکله په رسمي توگه معلومات نه دي ورکړل شوي.
د GIZ په نوم دغې نادولتي موسسې په افغانستان کې د خپلو کارکوونکو له نيول کېدو وروسته خپل فعاليتونه وځنډول. په افغانستان کې د طالبانو تر واکمنۍ وروسته جرمني په افغانستان کې خپل سفارت تړلی دی.