_{تاند (پنجشنبه، د سنبلې ۱۵ مه) د ایران د تایباد ولسوال اعلان وکړ چې د دغه هېواد ۷۰۰ لارۍ له تېرو ۹ ورځو راهیسي په هرات او اسلام کلا کې درول شوي دي.}

_{مهدي شیردل پرون (چهارشنبې) ایرنا خبري اژانس ته وویل، طالبان هڅه کوي د ایراني لاریو پر تګ راتګ د بندیزونو په لګولو سره د افغان لاریو فعالیت زیات کړي.}

_{د تایباد ولسوال همداراز وویل چې د دغو لاریو چلوونکي او خاوندان د طالبانو د همکارۍ په تمه دي، خو  هغوی تراوسه کوم اقدام نه دی کړی.}

_{مهدي شیردل زیاته کړه: د هرات او اسلام کلا  د ګمرک چارواکو د خپلو ترانسپورتي لاریو له تګ راتګ سره د مرستې په هدف هغو لاریو ته لومړی نوبت ورکوي چې د افغانستان له لوري د ایران د دوغارون بندر ته ځي.}

_{د دغه ایراني چارواکي د معلوماتو له مخې، له دې پولې د افغان لاریو تګ او راتګ له کوم بندیز پرته روان دی.}

_{مهدي شیردل په افغانستان کې د ایراني لاریو درول «اجباري» وبلل او ویې ویل چې د دې ستونزې د حل لپاره د دوغارون په سرحدي ګمرک کې د ایران او افغانستان د اقتصادي فعالانو او اړوندو بنسټونو په حضور کې غونډه جوړه شوې ده.}

_{په ورته وخت کې هغه اعلان وکړ چې طالبانو تر اوسه په دې اړه کوم اقدام نه دی کړی.}