تاند (دوشنبه، د سنبلې ۱۲ مه) د کډوالۍ نړیوال سازمان (IOM) اعلان وکړ چې د اګست د ۱۹مې او اګست ۲۵ تر منځ له ۷۲۰۰۰ څخه ډېر کسان د طالبانو تر کنټرول لاندې افغانستان پریښود.
ملګری ملتونه وایی، په همدې موده کې له ۶۴ زرو ډېر کسان له بېلابېلو هېوادونو افغانستان ته ستانه شوی دی.
د کډوالۍ نړیوال سازمان (IOM) چې افغانستان ته د تلونکو او ورڅخه وتونکو شمېرې خپروي، نن (دوشنبې) (د سپتمبر په ۲مه) وویل چې په یوه اوونۍ کې ۷۲ زره افغانان له خپل هیواده بهر ته تللي دي.
د دې ادارې په وینل، په دې موده کې؛ یعني د اسد له ۲۸ څخه د سنبلې تر ۳ پورې، له افغانستان څخه د وتلو کسانو شمېر د راغلیو پرتله ۱۱ سلنه ډېر دی.
آی او ایم وايي چې په دې اوونۍ کې ۵۹ سلنه راستانه شوي کسان د ایران له اسلامي جمهوریت څخه دي. خو په همدې موده کې د وتلو کسانو ۵۳ سلنه ایران ته تللي دي.
د راپور له مخې، په دې موده کې له ایران څخه تر ۳۸۰۰۰ ډېر افغانان او له پاکستان څخه تر ۲۶۰۰۰ ډېر افغانان افغانستان ته راستانه شوي دي.
د مهاجرت نړیوال سازمان وایي، له ایران څخه په راستنو شویو کسانو کې ۱۸ سلنه ښځې او د ۱۸ او ۵۹ کلونو ترمنځ کسان دي.
د مهاجرت نړیوال سازمان زیاتوي، افغانان په عمده توګه د اقتصادي دلایلو، درملنې او د کورنیو د غړیو د لیدلو لپاره ایران او پاکستان ته تللي دي.
ملګرو ملتونو په مکرر ډول په افغانستان کې د بشري بحران او د خوړو د ناامنۍ په اړه خبرداری ورکړی او ویلي یې دي چې دغه وضعیت د افغانانو د ژوند د خرابوالي لامل شوی دی.