تاند (یکشنبه، د سنبلې ۱۱ مه) د طالبانو د کډوالو او بېرته راستنېدونکو وزارت وايي، پرون (شنبې)، له پاکستان او ایران څخه په یوه ورځ تر یو نیم سل ډېرې کورنۍ افغانستان ته راستنې شوې.
د دغه وزارت د خبرپاڼې پر اساس، ۶۹ کورنۍ له پاکستان څخه او ۸۲ کورنۍ له ایران څخه افغانستان ته ستنې شوي دي.
د پاکستان له لوری په ایستل شویو کسانو کې،۳۱ کورنۍ د تورخم له لارې او ۳۸ کورنۍ د سپین بولدک له لارې افغانستان ته ګرځېدلي دي.
په ورته وخت کې، ۴۸ کورنۍ، چې له ایران څخه ستنې شوي، په نیمروز کې د ورېښمو پُل له لارې، او ۳۴ کورنۍ د هرات د اسلام کلا له لارې بېرته راستنې شوې.
د ملګرو ملتونو د کډوالو د لویې کمېشنرۍ (یو اېن اېچ سی ار) د راپور له مخې، د ۲۰۲۳ کال د سپتمبر له ۱۵مې نېټې څخه د روان کال د جولای تر ۳۱مې پورې له پاکستان څخه تر ۶۸۳ زره ډېر افغان کډوال افغانستان ته په خپله خوښه یا په زوره تللي دي.
پاکستان د تیر کال په اکتوبر میاشت کې اعلان وکړ چې ټول بې اسناده کډوال له خپلې خاورې باسي.
دې هیواد په وروستیو کې وویل چې د کډوالو د ایستلو دوهم پړاو پیلوي.