د طالبانو د حکومت د ترانسپورت او هوایي چلند وزارت د هوا پېژندنې ریاست وړاندوینه کړې چې نن (جهارشنبې) او سبا (پنجشنبې) به د افغانستان پنځلس ولایتونه د سختو بارانونو، سیلونو او بادونو شاهد وي.
د هواپېژندنې د ادارې او همداراز د اوبو اوانرژۍ وزارت په خبرپاڼو کې ویل شوي چې په بدخشان، نورستان، کونړ، ننګرهار، لغمان، پنجشیر، کاپیسا، پروان، کابل، لوګر، میدان وردک، غزني، پکتیا، پکتیکا او خوست ولایتونو کې د ورښت او سیلونو وړاندوینه کېږي.
د روان کال د مې میاشتې له نیمایي راهیسې، د افغانستان په بېلابېلو ولایتونو کې پر له پسې بارانونه اوري او په ډیرو مواردو کې شدید بارانونه د سیلونو سبب شوي چې له کبله یې سلګونه کسان مړه شوي او ډېر مالي تاوانونه یې اړولي دي.
د طالبانو د اوبو او انرژۍ وزارت د کابل او هلمند د سیندیزو حوزو پر غاړو مېشتو خلکو ته خبرداری ورکړی چې د سیلونو د راوتلو خطر ته پام ولري.