د افغانستان په ننګرهار کې د مومند خپرندویه ټولنه وايي چې د کیسه لیکنې کورس کتاب یې چاپ کړی دی.
دا د ایمل پسرلي له لورې د هغو کورسونو د نوټونو او لارښود ټولګه ده چې په تېرو څو کلونو کې یې د ادبیاتو د پوهنځي محصلینو ته ان لاین جوړ کړي وو.
په دې کتاب کې د استاد اسد الله غضنفر، ارواښاد نصیر احمد احمدي او اجمل پسرلي ځینې هغه مقالې هم شته چې د لنډو کیسو پر تخنیک لیکل شوې دي.
د کیسه لیکنې کورس کتاب کې له درو محصلینو سره د کیسو د تخنیک په بېلا بېلو برخو بحثونه شوي او عملي لارښوونې پکې شوې دي.
دا کتاب د کیسو په نوم، د کریکټرونو په نوم، د کیسې په پلاټ، زمان، مکان، ځایزمان، تلوسې، تصویر، مکالمې، نثر، تر کیسه لیکنې وړاندې د داستان پر نقشې بحثونه شوي دي. دغه راز له رښتینو پېښو د کیسو لیکلو هنر هم پکې یاد شوی دی.
مومند خپرندویه ټولنه وايي دا کتاب د ادبیاتو محصلینو ته او هغو کسانو ته چې غواړي کیسه لیکنه پیل کړي غوره اثر دی. دغه راز د هغو لپاره هم ښه کتاب بلل شوی چې د داستاني اثارو له لا ښه پوهېدو سره مینه لري.