تاند(یکشنبه، د اسد ۲۸ مه) د طالبانو رژیم پرته له دې، چې له انګریزانو څخه د افغانستان د خپلواکۍ ګټونکي پاچا غازي امان الله خان یادونه او قدراني وکړه، د دغې خپلواکۍ د ترلاسه کولو ۱۰۵ مه کلیزه ونمانځله.
په دې اړه د طالبانو رژیم په دفاع وزارت کې غونډه جوړه کړې وه، چې ګڼو چارواکو یې ګډون پکې کړی و او د دې ورځې په مناسبت یې ویناوې وکړې.
طالب چارواکو تر ډېره د دې ورځې په پلمه پر افغانستان د دوی د بیا واکمنۍ موضوع ته اشاره لرله او دې ته یې د خپلواکۍ ورځې نوم ورکاوه.
له انګریزي استعمار څخه د خلاصون د کلیزې په مناسبت طالبانو په خپره کړې اعلامیه کې هم د غازي امان الله خان یادونه نه ده کړې او ادعا یې کړې، چې د انګریزانو خلاف د جګړې مشري د دوی په وینا دیني عالمانو کړې ه.
د طالبانو چارواکو هم په خپلو ویناوو کې د غازي امان الله خان کومه یادونه نه ده کړې.
د طالبانو له بیا واک ته رسېدو سره د غازي امان الله خان د یو شمېر عکسونو سپکاوی هم شوی، چې منتقدان یې پړه پر طالبانو اچوي.
غازي امان الله خان په افغانستان کې د خپلواکۍ ګټونکي پاچا تر څنګ د ترقۍ او مدنیت هڅولو تر ټولو مخکښ پاچا یادیږي، چې د طالبانو د منتقدانو په باور طالبان یې له همدې امله مخالف دي.
طالبانو په ښکاره په دې اړه څه نه دي ویلي، خو د منتقدانو نیوکې یې هم نه دي رد کړي.