تاند (یکشنبه، د اسد ۱۴ مه) د ملګروملتونو د بشردوستانه مرستو د همغږۍ دفتر اعلان وکړ چې په افغانستان کې د مې په میاشت کې سیلونو لږ تر لږه ۸۳ زره کسان اغیزمن کړي دي.
اوچا وويل، بارانونو د افغانستان په يو شمېر ولايتونو په تېره بيا د هېواد په لوېديځ کې ډېرې ورانۍ ویجاړۍ پېښې کړي دي.
د ملګروملتونو دې ادارې نن (د اسد په ۱۴مه) پر خپله ایکسپاڼه کې په یوه پیغام کې لیکلي چې دا مهال په افغانستان کې ۱۲،۴ میلیونه وګړي د خوراکي توکو له کمښت سره مخامخ دي.
د اوچا په راپور کې راغلي چې په افغانستان کې ۲۳.۷ میلیونه وګړي مرستو ته اړتیا لري او د افغانستان ۴۸ سلنه وګړي د فقر تر کرښې لاندې ژوند کوي.
د ملګرو ملتونو د بشري مرستو د همغږۍ دفتر وايي، په دې حالت کې له ایران او پاکستان څخه د افغان کډوالو ایستل په افغانستان کې د خوراکي توکو بحران زیات کړی دی.
دا په داسي حال کې ده چې پاکستاني رسنیو نن راپور ورکړ چې د دغه هیواد له بېلابېلو ښارونو د بې اسناده افغان کډوالو د ایستلو بهیر دوام لري.
پاکستاني رسنۍ وايي چې له رسمي ارقامو سره سم، تر پرون (شنبې) پورې له پاکستان څخه ۶ لکه ۷۵ زره ۱۹۰ بې اسناده افغان کډوال ایستل شوي دي.
پاکستان د تېر کال په نوومبر کې د بې اسناده افغانانو د ایستلو پلان اعلان کړ.
د پاکستاني رسنیو پر اساس، مخکې تر دې چې پاکستان د بې اسناده کډوالو د ایستلو طرحه اعلان کړي، ډېر شمېر افغان کډوال له دې بېرې چې وبه نیول شي، له پاکستانه ووتل.
په همدې حال کې ایران هم له خپلې خاورې د افغان کډوالو ایستلو ته زور ورکړی دی.