تاند (جمعه، د اسد ۵ مه) د ورانکارۍ او اور اچونو څو پېښوو، چې فرانسوي چارواکي وايي د “همغږي بریدونه” وو د هیواد د ریل په شبکه کې پراخه ګډوډي رامینځته کړې.
د فرانس پریس خبري اژانس د راپور له مخې، په دې برخه کې تحقیقاتو ته یوې نژدې سرچینې وویل چې دا بریدونه ورانکارو عناصرو کړي دي.
د فرانسې د رېلګاډي د شرکت د مشر په وینا، د دې ګډوډیو په پایله کې، ۸۰۰ زره مسافر اغېزمن شوي او د ریلګاډو تګ یې ځنډول شوی دی.
دا پیښه په پاریس کې د المپیک د مراسمو تر پیلیدو مخکې وشوه او ښايي دا مراسم یې له کبله څو ساعته په ځنډ پیل شي.
د فرانسې د رېلګاډي شرکت په وینا، د پاریس په لویدیځ، شمال او ختیځ کې د هیواد د چټک یا ایکسپریس رېلګاډي پر شبکې بریدونه شوي دي.
شرکت ویلي: «تېره شپه د فرانسې د ملي اورګاډي شبکه د ورانکارۍ قرباني شوه. زموږ تاسیساتو ته د زیان رسولو لپاره قصدي اورونه اچول شوي دي.»
د یوروسټار ریلګاډی، چې د لندن او پاریس ترمنځ مسافرین لیږدوي، هم ګډوډ شوی.
لکه څنګه چې د فرانسې د اورګاډي شرکت چارواکي وايي، د جمعې په ورځ د ځینو اورګاډو پر لغوه کیدو سربیره، ګډوډي ممکن د شنبې او یکشنبې په ورځو کې دوام وکړي.