تاند ( دوشنبه، د زمري لومړۍ) په کابل کې د روسیې سفیر دیمیتري ژیرنوف ویلي، چې روسیه او افغانستان له څه مودې راهیسې پر ډالرو سوداګري پای ته رسولې او پر ځای یې له روسي روبلو او افغانیو استفاده کوي.
د هغه په وینا، له ډالرو سره د دواړو هېوادونو په سوداګرۍ کې د پرېکون دلیل دا دی چې دواړه هېوادونه د امریکا له اقتصادي بندیزونو سره مخ دي.
روسي سفیر دا خبره داسې مهال کړې، چې اوس هم افغانستان ته هره اوونۍ د ۴۰ میلیونه امریکايي ډالرو د استولو خبر ورکول کیږي.
امریکایي او طالب چارواکي دې پیسو ته د بشري مرستو نوم ورکوي او ادعا لري، چې واکمن طالب رژیم ته یې ګټه نه رسیږي، خو د طالبانو او ورسره د امریکا د اړیکو منتقدان باور لري چې دا او د پردې تر شا تورې پیسې په منظم ډول طالبانو ته د رژیم د مالي سرچینو د تمویل لپاره یې ورکول کیږي.
روسي سفیر په تازه مرکه کې له افغانستان سره د روسیې د سوداګرۍ د دوه برابره کیدو خبر هم ورکړی و.