تاند (دوشنبه، د جوزا ۱ مه) د دیموکرات ګوند یو شمیر مخکښو شخصیتونو له ټاکنیزو سیالیو څخه د جو بایډن د وتلو ستاینه وکړه.
د متحدوایالتونو پخواني ولسمشر بیل کلنټن او د بهرنیو چارو پخوانۍ وزیرې هیلري کلنټن په یوه ګډه اعلامیه ویلي چې دوی په دې ویاړي چې د کاملا هریس په ملاتړ کې له جو بایډن سره یوځای کېږي.
په بیان کې ویل شوي چې دوی د ډونالډ ټرمپ د واک له بیا ترلاسه کولو پرته نور د امریکا په اړه هیڅ اندیښنه نه لري.
هیلري کلنټن د ۲۰۱۶ کال په انتخاباتو کې د ډیموکراټ ګوند نومانده وه خو ډونالډ ټرمپ په خورا لږ توپیر ماته ورکړه.
د متحدوایالتونو د استازو جرګې پخوانۍ رییسې او د ډیموکراتیک ګوند یوې مخکښې مشره نانسي پلوسي، هم جو بایډن د “امریکا په تاریخ کې ترټولو مهم ولسمشر” بللی او لیکلي یې دي چې هغه د یو “هیوادپال” امریکایي په توګه تل د هیواد ګټو ته لومړیتوب ورکړی دی.
د سناجرګې د دیموکراتانو مشر سناتور چک شومر، ښاغلی بایډن یو “لوی ولسمشر” او په ورته وخت کې یو “په زړه پورې انسان” بللی چې د خپل هیواد د خپل ګوند او د امریکا د راتلونکې ګټې یې په لومړي سر کې ساتلي دي.
خو د سنا جرګې د دیموکراتانو د مشر سناتور چاک شومر په شمول ګڼ شمېر دیموکراتانو له کاندیداتورۍ څخه د ښاغلي بایډن د تېرېدو په اړه په لومړني عکس العمل کې د هغه د مرستیالې کاملا هاریس ملاتړ اعلان نه کړ.
رویټرز خبري اژانس د یوې خبرې سرچینې په حواله ویلي چې د امریکا ولسمشر جوبایډن ناڅاپه د ولسمشرۍ د راتلونکو انتخاباتو په اړه خپل فکر بدل کړی دی.
د دغه راپور له مخې، ښاغلي بایډن پلان درلود چې د شنبې تر شپې پورې په دې سیالۍ کې پاتې شي، خو د یکشنبې په ورځ پر ځايي وخت په ۱۳:۴۵ بجو یې د خپل ټیم لوړپوړو غړو ته اعلان وکړ چې له ټاکنو څخه به ځان وباسي.
د دې سرچینې په وینا، چې نه یې غوښتل نوم یې واخیستل شي، د امریکا ولسمشر دغه خبر په داسي حال کې اعلان کړ چې ټوخول یې.
ښاغلي بایډن په ځانګړي ډول د استازو جرګې پخوانۍ رییسې نانسي پلوسي ته “په غوسه” و هغې له انتخاباتي سیالۍ څخه د بایډن د وتلو لپاره کمپاین تنظیم کړی و.
د نانسي پلوسي په شان ګڼ نور دیموکراتان دې باور ته رسیدلي و چې بایډن له ټرمپ ]حخ انتخابات نه شي ګټلی.