تاند ( دوشنبه، د زمري لومړۍ) د پاکستان د دفاع وزیر خواجه آصف د جرمني په فرانکفورت کې د پاکستان پر کونسلګرۍ د برید له امله افغانانو ته سپکاوی کړی.

هغه تور پورې کړی، چې په دې برید کې افغانانو لاس درلود.

پاکستاني وزیر له دې امله افغانان « احسان فراموشه» ګڼلي دي.

د جرمني په فرانکفورت ښار کې د پاکستان د کونسلګرۍ مخته له مظاهرې او د دغه هیواد د بیرغ له کښته کولو وروسته د پاکستان د اطلاعاتو وزیر عطا تارړ ویلي، چې په دې برید کې د لاس لرونکو پاکستاني اتباعو شناختي کارډونه او پاسپورټونه به لغوه کوي.

عطا تارړ وویل چې ښايي د عمران خان ګوند د دغه هېواد پر کونسلګرۍ برید ته د خلکو په هڅولو کې لاس ولري.

د عمران خان د تحریک انصاف ګوند تر اوسه د دغو څرګندونو په اړه غبرګون نه دی ښودلی.

تر دې مخکې پاکستاني رسنیو تور لګولی و چې د افغانستان یو شمېر اتباعو په فرانکفورت کې د دوی پر قونسلګرۍ برید کړی دی.

په افغانستان کې د طالبانو واکمن رژیم د پاکستاني وزیر دغه سپکاوي ته تر اوسه غبرګون نه دی ښودلی.