تاند (سې شنبه، د سرطان ۲۶ مه) په ننګرهار کې د دوشنبې د مازدیګر د سختو بارانونو له امله د مړینو شمېر ۴۷ تنو ته ورسید خو وېره ده چې تر دې هم زیات کسان مړه شوي وي.
همداراز تراوسه پورې د ټپیانو شمېر ۳۵۰ تنه اعلان شوي دي. خو ویره ده چې ممکن د مرګ ژوبلو شمېر تر دې هم زیات وي.
له ننګرهار څخه د شاهدانو، د روغتونونود ډاکترانو او ځايی چارواکو د معلوماتو له مخې، توپان او باران خلکو ته ډېر مالي تاوانونه هم اړولي دي، د برېښنا ستنې او ګڼې ونې یې له بیخې ایستلي دي.
د ملګروملتو د کډوالو لویه کمیشنري وايي چې دې باران او توپان له پاکستانه تازه راستانه شوي کډوال سخت ځپلي چې په خیمو کې یې اړولي دي.
د ننګرهار له طبیعي پېښو سره د مبارزې رییس سیف الله خالد نن د ۴۷ تنو مړینه تایید کړه او زیاته یې کړه چې توپان شاوخوا ۴۰۰ کورونه نړولي دي.
د ننګرهار اطلاعاتو او کلتور رييس قريشي بدلون باختراژانس ته ویلي چې د سختو توپانونو او بارانونو له امله د لسګونو کسانو د مرګ ژوبلې ترڅنګ د کورونو ونې، ديوالونه او چتونه نړولي دي.
هغه زياته کړه: “د دې احتمال شته چې مرګ ژوبلې شمېر لوړ شي.”
د بدلون په وینا، ټپيان او د قربانيانو مړي د ننګرهار حوزوي روغتون او فاطمة الزهرا روغتون ته وړل شوي دي.
افغانستان سږ کال له ډېر وچ ژمی وروسته د غیر معمولي باراني پسرلي شاهد و.
د مې په میاشت کې، په سلګونو کسان وروسته له هغه مړه شول چې سیلونو په ځانګړي ډول د بغلان ولایت یو شمېر سیمې لاندې کړې. دغو سیلونو ډېرې کرنیزې مځکې ویجاړې کړې.
ملګري ملتونه او د اقلیمي چارو متخصصان د افغانستان سږني ورښتونه له اقلیمي بدلون سره تړلي بولي. او وايي چې افغانستان د نړۍ یو له هغو څو هیوادونو څخه دی چې اقلیمي بدلون یې سخت زیانمنوي.
د افغانستان پخواني ولسمشر اشرف غني هم نن پر خپله ایکسپاڼه لیکلي چې افغانستان تر بل هر ځای له اقلیمي بدلون څخه ډېر زیانمنېدونکی دی.
نوموړی همداراز لیکلي چې د ورته تکرارېدونکو پېښو مالي عواقب د هېواد او کورنیو پر مات اقتصاد ځورونکې اغېزې کولی شي.
الله دی ړا ټول قربیانیان په شهیدانو کی حساب کړی.
الله ړی ددې طبیعی مصیبت ټول قربانیان په شهیدانو کی حساب کړی.