تاند (سې شنبه، د سرطان ۲۶ مه) د پاکستان پوځ تایید نن ومنله چې د خیبر پښتونخوا په بنو کې د پاکستاني طالبانو د مشر حافظ ګل بهادر د جنګیالیو په برید کې اته پاکستاني سرتېري وژل شوي دي.
د پاکستان پوځ ادعا کوي چې د حافظ ګل بهادر ډله په افغانستان کې مېشته ده او پوځ به یې د افغانستان د ګواښونو پر وړاندې لازم اقدامات وکړي.
د پاکستان پوځ په یوه بیان کې لیکلي چې د دوشنبې په سهار د خیبر پښتونخوا په بنو کې پر پوځي اډې د ټي ټي پي لسو وسله والو د پوځ پر یوه مهم مرکز برید وکړ.
د پوځ په وینا برید کوونکو له چاودېدونکو توکو ډک خپل موټر د دې پوځي اډې مخې ته وچاوداوه. د پاکستان پوځ وايي، د کمپ ساتونکي وروسته له هغه ووژل شول چې موټر بم وچاودید او دیوال ونړېد.
د ایکسپریس ټریبیون ورځپاڼې د راپور له مخې، د پاکستان پوځ ویلي چې ساتونکو یې په خپل مقاومت سره د یوې ډېرې خطرناکې پېښې مخه ونیوله.
تر دې مخکې د پاکستان پوځ او رسنیو د ۳ پوځیانو د وژل کېدو خبر ورکړی و. ورځپاڼې د وژل شویو پوځیانو عکسونه هم خپاره کړي دي.