تاند (سه شنبه، د سرطان ۲۶ مه) د احصائيې او معلوماتو ملي ادارې لپاره د طالبانو د رژیم چارواکي وايي چې دغه اداره پلان لري، له هېواده بهر یو شمېر هېوادونو کې د برېښنايي پېژندپاڼو د وېش څانګې فعالې کړي.
د یادې ادارې ویاند محمد حلیم رفیع وویل چې په دغو وروستیو کې د احصائيې او معلوماتو ملي ادارې یو ټیم له هېواده بهر، عربي متحدو اماراتو کې پر افغانانو د برېښنايي پېژندپاڼو بهیر پیل کړ او په پام کې ده؛ چې په ایران، پاکستان، ترکیه او د خلیج په یو شمېر هېوادونو کې هم د دې ادارې د برېښنايي پېژندپاڼو د وېش څانګې پرانيستل شي.
رفیع زیاته کړه چې د احصائيې او معلوماتو ملي اداره اوسمهال د هېواد په کچه، ۷۸ فعال مرکزونه لري چې د دغو مرکزونو له لارې په ورځني ډول تر ۱۱ زره برېښنايي پېژندپاڼې پر هېوادوالو وېشل کېږي.
هغه زیاتوي چې والو د برېښنايي پېژندپاڼو د وېش بهیر له پیل څخه تر اوسه پورې؛ پر ۱۳.۷ میلیونه افغانانو برېښنايي پېژندپاڼې وېشل شوې او دغه ملي بهیر په عادي ډول دوام لري.