تاند (دوشنبه، د سرطان ۲۵ مه) د کوزې پښتونخوا د سوات سیمه کې له یوه کور څخه د یوې مېرمنې او د هغې د درېیو پېغلو لوڼو جسدونه ترلاسه شوي.
یوه سیمه ییز پولیس چارواکي عمر رحيم ویلي، چې د پېښې انګېزه تر اوسه نه ده معلومه، خو څېړنې یې پيل شوي.
ویل کیږي چې د پېښې په تور د ښځې د ژوند د ملګري او د نجونو د پلار د نیولو هڅې روانې دي.
لا کره نه ده دا پېښه هغه کړې او کنه، خو شک پرې شوی.
دا هم نه ده ښکاره، چې دا پېښه د نورو داسې وژنو په شان د غیرت یا ناموسي وژنو په نوم کومه پلمه او توجیه تر شا لري کنه؟
په وروستیو کې له پښتونخوا څخه داسې خبرونه زیات شوي، چې دلیل یې د پاکستاني مدرسو او ملایانو له لارې د مذهبي افراطیت زیاتوالی دی.