تاند (دوشنبه، د سرطان ۲۵ مه) د طالبانو د اقتصاد وزیر قاري دین محمد حنیف د افغانستان لپاره د جاپان سفیر تاکایوشي کورومیا او مل پلاوي سره لیدنه کې په د دوه اړخیزو اقتصادي همکاریو د ښه والي او د بشري مرستو د دوام او پراختیا په اړه خبرې کړي.
د طالبانو د اعلامیې له مخې، په دې لیدنه کې په افغانستان کې د جاپان سفير، د نشه يي توکو له کښت سره د مبارزې او د کوکنارو د کرکيلې د بديل معیشت پروژو د پلي کېدو په موخه د جاپان هېواد له خوا د لسو مليونو ډالرو مالي مرستې په اړه چې په پام کي ده د بدخشان، هلمند او کندهار ولایتونو کی له بزګرانو سره د مرستې، د نشه يي توکو د کارونې د مخنيوي، د معتادینو د درملنې او د زیانمنو وګړو او زیانمنو شویو سیمو د بیارغونې پروګرامونو له لاری ولګول شي د اقتصاد وزیر سره پرې خبرې کړي.
د طالبانو وزیر افغانستان سره د جاپان هېواد د ۱۰ میلیونه ډالرو مرستې څخه مننه کړې، چې د بدیل معیشت د پروګرامونو په پلي کولو، د روغتیايي خدمتونو په وړاندې کولو او په نشه يي توکو د روږدو کسانو د درملني لپاره څانګړي شوي.
قاري دین محمد حنیف د دغو پروژو پلی کېدل په بېلا بېلو ولایتونو کې د کاري فرصتونو د رامنځته کولو او د کورنیو د اقتصادي ملاتړ لپاره اغیزمني بللي .
د جاپان سفیر له افغانانو سره د خپل هېواد له خوا د نشه یي توکو له کښت سره د مبارزې او بشري مرستو د دوام ژمنه کړې.