تاند (یکشنبه، د سرطان ۱۷ مه) د تاجکستان ولسمشر امام علي رحمان له خپل چينايي ساري سره له کتنې وروسته په يوه خبري ناسته کې وړانديز وکړ چې د چين، تاجکستان او افغانستان ترانسپورتي کوریدور په اوږدو کې دې د سړکونو او ریلګاډو د جوړولو لپاره عملي تدبيرونه غوره شي.
ده ټینګار وکړ چې د چین، تاجکستان او افغانستان ترمنځ د ټرانسپورټي دهلیز پراختیا به سیمه ییز اتصال او سوداګري پراخه کړي.
په دې کتنه کې امام علي رحمان او شي جين پينګ د «يو کمربند، يوې لارې» نوښت په چوکاټ کې د همکارۍ پر دوام خوښي څرګنده کړه.
د راپورونو له مخې، تاجکستان ته د شي جين پينګ د سفر په ترڅ کې دواړو هېوادونو په بېلابېلو برخو کې د ٢٩ مهمو سندونو په لاسليکولو سره خپلې اړيکې پياوړې کړې دي.