تاند (سې شنبه، د سرطان ۱۲ مه) د ملګرو ملتونو سرمنشي انتونیو ګوتریش د رسمي سفرونو په لړ کې د منځنۍ اسیا هېوادونو ته روان شوی.
د ملګرو ملتونو په یوه اعلامیه کې راغلي، چې ښاغلي ګوتریش د خپلو دغو سفرونو په پيل کې ازبکستان ته تللی او د دغه هېواد له ولسمشر شوکت میرضیایف سره لیدلي.
د سرچینې د معلوماتو له مخې، په دې لیدنه کې د سیمې د ثبات په اړه خبرې اترې شوي.
د دغو خبرو د جزیاتو په اړه څه نه دي ویل شوي.
تمه ده چې د ملګرو ملتونو سرمنشي به د دغو سفرونو په لړ کې قرغیزستان، قزاقستان، تاجکستان او ترکمنستان ته هم سفرونه وکړي.
په دې سفرونو کې د افغانستان په اړه د خبرو مشخص څه نه دي ویل شوي، خو معمولاً د افغانستان وضعیت هم د سیمې د هېوادونو د مشرانو او نورو لوریو د خبرو له مهمو بحثونو څخه وي.