تاند (دوشنبه، د سرطان ۴ مه) د طالبانو د اطلاعاتو او فرهنګ وزیر ملا خیرالله خیرخواه وایي ، چې وزارت یې د رسنیو په مخکیني قانون کې له لږو بدلونونو سره دغه قانون عملي کوي.
نوموړي پکتیا کې خبریالانو سره یوې ناستې ته دا خبره کړې.
ورته خبره بیا- بیا تر دې مخکې طالب چارواکو کړې او د نورو قوانینو تر څنګ یې د رسنیو لپاره د قانوني تشې د ژر ډکولو ژمنه کړې، خو ژمنه یې نه ده عملي کړې.
د طالبانو د رژیم ویاند ذبیح الله مجاهد څو میاشتې مخکې ویلی وو، چې د رسنیو قانون تعدیل شوې طرحه د دوی عمومي مشر ملا هبت الله ته استول شوې، چې ژر یې نهایي او د عملي کیدو اعلان یې وشي.
د طالبانو وزیر نن ویلي، چې دوی په یاد شوي قانون باندې زیاتې ملاحظې نه لرلې؛ بلکې ځینې موارد یې پکې بدل کړي او د ده په خبره ملي ګټو او اسلامي شریعت ته پکې ډېر ځای ورکړل شوی.
د طالبانو له بیا واک ته رسېدو سره درې کاله کیږي چې افغانستان د اساسي قانون په ګډون زیات قوانین نه لري.
د رسنیو په برخه کې طالبان تر ډېره په خپلسرۍ او خبریالانو سره په ناوړه چلند او سانسور تورن شوي، خو دوی دا ادعاوې ردوي.