تاند (دوشنبه، د سرطان ۴ مه) د طالبانو د ريیس الوزرا اقتصادي مرستیال “عبدالغني برادر” د جنوبي افریقا له یو شمېر پانګوالو، پوهانو او د روغتیايي سیکتور کارپوهانو سره وکتل.
د ملا برادر د دفتر د خبرپاڼې له مخې، په دې کتنه کې د جنوبي افریقا پانګوالو وویل چې په افغانستان کې د پانګونې لپاره ښه فرصتونه شته او د کانونو په برخه کې یې پانګونې ته لېوالتیا وښوده.
خبرپاڼه زیاتوي چې د جنوبي افریقا پلاوي ویلي چې په پرمختللې ټکنالوژي د افغانستان د کانونو له استخراج او پروسیس سره مرسته کولی شي.
د دغه هېواد د روغتیايي سکتور متخصصانو هم د طالبانو د ريیس الوزرا له اقتصادي مرستیال سره په کتنه کې اعلان وکړ چې دوی غواړي د افغانستان د روغتیا وزارت په همغږۍ یو معیاري او مجهز روغتون جوړ کړي، څو د روغتیايي سکتور ملاتړ وکړي او افغانانو ته معیاري روغتیايي خدمات وړاندې کړي.
ملا برادر هم د جنوبي افریقا پانګوالو، پوهانو او د روغتیايي سیکتور متخصصانو ته د همکارۍ او ملاتړ ډاډ ورکړ او ویې ویل: اوس مهال په افغانستان کې د پانګونې لپاره ښه زمینه برابره ده او کورني او بهرني پانګوال کولای شي له دې فرصته ګټه پورته کړي.