سه شنبه, جولای 23, 2024
Homeخبرونهپه کوزه پښتونخوا کې د ناامنۍ خلاف احتجاجي پرلت او سخته نښته

په کوزه پښتونخوا کې د ناامنۍ خلاف احتجاجي پرلت او سخته نښته

تاند (یکشنبه، د سرطان ۳ مه) د پښتونخوا په خیبردره کې قومي مشرانو، سپینږیرو او سیاسي فعالانو د ناامنۍ او هدفي وژنو خلاف احتجاجي پرلت کړی دی.

دوی حکومت ته ۵ ورځې وخت ورکړی چې د خبریال خلیل جبران په وژلو کې لاس لرونکي ونیسي.

د اعتراض برخوالو په خپلو ویناوو کې وویل چې د دوی په سیمه کې د خلکو ژوند له ګواښ سره مخامخ دی او ورځ تر بلې امنیتي پېښې ډېریږي.

له دې احتجاج سره هممهاله د پښتونخوا له کوزدیر څخه د ترلاسه شویو راپورونو له مخې، د پاکستان د امنیتي ځواکونو او مخالفو وسله والو ترمنځ په سخته نښته کې ګڼ شمېر ملېشه او پوځیانو ته مرګ ژوبله اوښتې ده.

د پاکستان امنیتي چارواکي د دوو ملېشو وژل کېدا تاییدوي خو ځايي رسنۍ وايي چې نه یوازې څو ملېشه او پوځیان وژل شوي بلکې ګڼ نور ټپیان شوي دي.

دوی د ۴ پوځیانو او ۲ ملېشه ځواکونو وژل کېدل تاییدوي.

نښته د شنبې په ورځ د کوزدیر په (سوري پاو) سیمه کې هغه مهال پیل شوه چې د پاکستان د پوځ مخالفو وسله والو د امنیتي ځواکونو پر پوستې برید وکړ.

په ټولنیزو رسنیو کې په خپرو شویو پوسټونو او ویدیوګانو کې د پاکستان پوځ ته د اوښتو مرګ ژوبلو شمېر خورا لوړ ښودل شوی دی.

له بلې خوا د ټي ټي پي له لوري له دې اعلان سره په یو وخت چې د پنجاب په ډیره اسماعیل خان کې یوه وسله واله ډله ورسره یوځای شوې ده، د پنجاب ایالت د ترهګرۍ ضد ادارې ادعا وکړه چې د صوبې په بیلابیلو سیمو کې یې ۲۲ «ترهګر» نیولي دي.

ټي ټي پي یا د پاکستاني طالبانو تحریک وايي، چې یوه بله وسله واله ډله ورسره یوځای شوې ده. د ټي ټي پي له ادعا سره سم، د مفتي ابو لیث په مشرۍ ډله د دوی له مشر مفتي ابو منصور سره بیعت کړی دی. د دې ډلې ویاند محمد خراساني په یوه خبرپاڼه کې ویلي چې له خیبر پښتونخوا او بلوچستان وروسته د پنجاب او سند خلک او په تېره بیا هلته د پاکستان د پوځ مخالفې وسله‌والې ډلې پر دې پوه شوي، چې له ظلم او ستم څخه د خلاصون یوازینۍ لاره د تحریک پاکستان له ډلې سره یو ځای کېدل او له دې ډلې سره په ګډه مبارزه ده. دوی ویلي چې د ابولیث ډله د پنجاب ایالت په ډیره غازي خان کې فعالیت کوي. خپلواکو سرچینو د ټي ټي پي د دې ادعا او د مفتي ابولیث د ډلې د پوځي او ولسي اغېز په اړه تراوسه څه نه دي ویلي. د پاکستان پوځ ټي ټي پي یوه ترهګره ډله بولي او په وینا یې دا ډله پر پوځیانو او بې ګناه ملکیانو بریدونه کوي.

LEAVE A REPLY

Please enter your comment!
Please enter your name here

- Advertisment -

ادب