تاند (پنجشنبه، د جوزا ۳۱ مه) د جرمني د کورنیو چارو وزیره نانسي فایسر (Nancy Faeser) وايي، افغانستان ته د «جنایي مهاجرو» د ایستلو په اړه له دریمو هیوادونو سره پټې خبرې پیل شوي دي.
د جرمني ځايي ورځپاڼې «Nue Osnabrücker Zeitung» د چهارشنبې په ورځ (جون ۱۹مه) راپور ورکړ چې فایسر دا څرګندونې د خپل هیواد د ایالتونو له کورنیو چارو وزیرانو سره په کتنه کې وکړې.
د جرمني د کورنیو چارو وزیرې وویل، «موږ په جدي ډول کار کوو چې خطرناک اسلامپال او د تاوتریخوالي عاملان افغانستان ته واستولی شو.»
هغې ټینګار وکړ چې د جرمني امنیتي ګټې د دوی لومړیتوب دی او زیاته یې کړه: «موږ له بېلابېلو هېوادونو سره پټې خبرې کوو څو داسې لارې چارې ولټوو چې افغانستان ته د اخراج امکان برابر شي.»
جرمني چارواکو وروسته له هغه د افغان کډوالو پر ایستلو تمرکز زیات کړ چې یوه افغان مهاجر په منهایم ښار کې د اسلام ضد ډلې «پاکس یوروپا» په غونډه کې په چاقو برید وکړ چې په پایله کې یې یو جرمنی افسر ووژل شو.
تېره اوونۍ د جرمني رسنیو راپور ورکړ چې یوه بل افغان کډوال د اروپا د فوټبال اتلولیو د لیدو په حال کې یو افغان په چاقو وواژه او درې نور یې ټپیان کړل.
په همدې حال کې یو شمېر نورو جرمني چارواکو هم له دغه هېواد څخه د مجرمانو د ایستلو د پرېکړې ملاتړ کړی او ویلي یې دي چې د دغو کسانو د اخراج لپاره د اسانتیاوو د رامنځته کولو لارې چارې لټوي.