تاند (جمعه، د جوزا ۱۸ مه) د ایران مهر خبري اژانس نن راپور ورکړ چې د افغانستان لپاره د سیمه ییز تماس ډلې غونډه د ایران، چین، روسیې او پاکستان د ځانګړو استازو په ګډون سبا په تهران کې جوړیږی.
د ایران د بهرنیو چارو په وزارت کې د جنوبي اسیا د برخې عمومي ريیس رسول موسوي په یوه پیغام کې چې پر خپله ایکسپاڼه یې خپور کړی، لیکلي چې تهران به د جون په اتمه نیټه د افغانستان لپاره د سیمه ییز تماس ډلې د غونډې کوربه وي.
ده زیاته کړې چې د ایران، پاکستان، چین او روسیې د ځانګړو استازو سلا مشورې د تهران د غونډې د اجنډا په سر کې دی.
موسوي دا هم ویلي چې د تهران غونډه به د سیمه ییزو همکاریو او مشارکت په رڼا کې د افغانستان او سیمې لپاره د سولې، ثبات او پرمختګ پیغام وي.
دا غونډه له دوحې د درېیمې غونډې مخکې جوړیږي او ښايي هدف یې دا وي چې د دوحې د غونډې لپاره تهران له خپلو متحدانو سره دریځونه همږغي کړي.