تاند (سې شنبه، د جوزا ۱۵ مه) د طالبانو د بهرنیو چارو وزارت د قزاقستان د هغې پریکړې هرکلی کړی چې د تروریستي سازمانونو له لست څخه یې د دې ډلې د ایستلو په اړه کړې ده.
د قزاقستان ولسمشر قاسم جومارت توقایف د دوشنبې په ورځ اعلان وکړ چې د طالبانو نوم یې د ترهګرو ډلو له نوملړ څخه ایستلی دی.
د طالبانو د بهرنیو چارو وزارت نن )سې شنبې د جوزا ۱۵مه) په یوه خبرپاڼه کې لیکلي چې د قزاقستان دا پرېکړه له طالبانو سره د اړیکو په برخه کې یو مهم ګام دی او د دوه اړخیزو اړیکو د پراختیا پر وړاندې خنډونه لېرې کوي.
په خبرپاڼه کې راغلي چې قزاقستان د سیمې په کچه د افغانستان مهم سوداګریز او ترانزیتي شریک دی.
طالبانو ویلي چې د قزاقستان دا پرېکړه به د دوه اړخیزو اړیکو او اقتصادي همکاریو د پرمختګ لپاره زمینه برابره کړي.
تر دې مخکې جګپوړو روسي چارواکو هم په دغه هېواد کې د ترهګرو ډلو له لېست څخه د طالبانو د نوم د ایستلو د احتمال خبره کړې وه.
د روسیې ولسمشر ولادیمیر پوتین په وروستیو کې له طالبانو سره د اړیکو ټینګول یوه اړتیا ګڼلې وه.
ځینې شنونکي وايي چې د قزاقستان له لوري د ممنوعه ډلو له لیسته د طالبانو د ایستلو پرېکړه، ممکن روسیې او ځینو نورو هیوادونو ته هم لار پرانیزي چې ورته ګام واخلي.