تاند (دوشنبه، د جوزا ۱۴ مه) د هرات د والي وياند نثار احمد الياس وايي چې په وروستیو ورځو کې د دوی امنیتي ځواکونو په دې ولایت کې د داعش غړي نیولي دي.
الیاس د ایران تسنيم خبري اژانس ته ویلي: «هغه ترهګر چې په دې وروستيو کې په دغه ولايت کې امنيتي ځواکونو نیولي، د داعش غړي دي.»
الیاس زیاته کړه: «د افغانستان د اسلامي امارت د ځواکونو د هلو ځلو په نتیجه کې په هرات کې د داعش یوه مهمه ډله له منځه یوړل شوه.»
د طالبانو د هرات د والي د ویاند په وینا، نیول شوې ډلې په تيرو اتو مياشتو کې په هرات کې پر خلکو بريدونه کړي وو او د هغوى وروستۍ حمله څه د پاسه يوه مياشت مخکې په ګذره ولسوالي کې وه.
الياس دا هم وويل، چې دغو ترهګرو په راتلونکي کې د نورو بريدونو پلان درلود چې د هغوى په نيولو سره شنډ شول.
ده په دوام کې وويل: د داعش له غړیو څخه يو ځانمرګي واسکټ، څو وسلې او يو موټر هم ترلاسه شوي دي.
پرون (یکشنبه) د طالبانو د هرات د والي مرستیال حیات الله مهاجر پر خپله ایکسپاڼه ولیکل چې فراهي د ګوذرې ولسوالۍ د حملې عاملان نیول شوي «په هرات کې د ]فتنهګرو[ یوه ډله چې یوه میاشت مخکې یې د هرات په ګذره ولسوالي کې پر جومات برید پلان کړی و، نیول شوې ده. له دوی سره د ځانمرګي بریدګر یو واسکټ، یو موټر او څو وسلې نیول شوې دي.»
د دغه برید، چې په یوه جومات کې یې شیعه ګان په نښه کړل، مسوولیت داعس ډلې په غاړه واخیست.