تاند(چهارشنبه، د جوزا ۹ مه) د ترکیې ولسمشرۍ په یوه خبرپاڼه کې اعلان وکړ چې افغان طالب چارواکو ته د دیپلوماتیکو ویزو معافیت لغوه دی.
د ترکیې د ولسمشر رجب طیب اردوغان له خوا د لاسلیک شوې حکم پر بنسټ، د ډیپلوماټیک پاسپورټ لرونکو لپاره د ویزې د دوه اړخیزې لغوې په باب د ترکیې جمهوریت او د افغانستان د اسلامي جمهوریت د دولت ترمنځ هوکړه لیک د روان ۲۰۲۴ د جون له لومړۍ نېټې لغوه دی.
د دوو هیوادونو ترمنځ د دیپلوماتیکو اړیکو د پیاوړتیا لپاره دا موافقه د ترکیې ولسمشر د 2007 کال د سپټمبر په 29 نیټه لاسلیک کړې وه او د 2008 کال د جنورۍ په 8 نیټه د وزیرانو شورا له تصویبه وروسته نافذ شوه.
د دې پرېکړې معنا دا ده چې نور د طالبانو دیپلوماتان له ویزې پرته ترکیې ته تللی نه شي.
د ترکیې د ولسمشرۍ د دفتر په بیان کې دې ته کومه اشاره نه ده شوې چې ولسمشر رجب طیب اردوغان دا پرېکړه ولې کړې ده.