تاند (سې شنبې، د جوزا ۸ مه) له زابل څخه راپورونه ښيي، چې د پرځیدلي جمهوري نظام د وژل شوي مرستیال ویاند دواخان مینه پال ورور نورالله مینه پال په مرموز ډول وژل شوی.
دواخان مینه پال، چې د جمهوري نظام په وروستۍ میاشت یې کابل کې د وژل کېدو مسوولیت اوسنیو واکمنو طالبانو پر غاړه اخیستی و، د ورور د مرګ پړه یې هم پر دوی اچول شوې.
یو شمېر طالب سرچینو بیا ویلي، چې نوموړی د شاه جوی ولسوالس په کاجوې سیمه کې د ترافیکي پېښې له امله مړ شوی.
ځینو نورو سرچینو بیا د پېښې لامل ناڅرګند وسله وال ګڼلي.
تاند له دې ادعاوو څخه یوه هم د خپلواکو سرچینو له قوله تایید نه کړای شوه.
د طالبانو د شاوخوا درې کلنې بیا ځلي واکمنۍ پر مهال دوی بیا- بیا د جمهوري نظام د منسوبینو او خپلو مخالفانو په وژلو او ځورولو تورن شوي، خو دوی دا ادعاوې رد کړې دي.