تاند (۴ شنبه، د ثور ۱۹ مه) د سویلي پښتونخوا په چمن کې د پاکستان لخوا د ډیورنډ کرښې د دواړو غاړو پښتنو ته په پاسپورټ او ویزې د تګ راتګ د جبري کېدو د پرېکړې په غبرګون کې اوس د جنوبي وزیرستان په انګور اډه کې سلګونو کسانو د دغې پرېکړې خلاف پرلت پيل کړی.
د دغه پرلت مشرانو ویلي چې نن به دوی په یوه جرګه کې خپله راتلونکې کړنلاره باندې بحث کوي او له حکومت سره د خبرو لپاره به یو پلاوی ټاکي.
دغه اعتراض افغانستان ته د اوښتو لپاره د پاسپورټ او ویزې د شرط له عملي کولو وروسته راپورته شوی دی.
دغه شرط د تېر ۲۰۲۳ کال په نومبر کې وضع شو.
پرلتوال وايي چې پر انګور اډه د سفري اسنادو لازمي کول د پولې د دواړو خواوو سوداګرو، مزدورانو، ټرانسپورټرانو او ولسونو اقتصاد اغېزمنوي.
پاکستان تر اوسه په دې اړه د چمن د څو میاشتني پرلت غوښتنې نه یوازې منلې نه دي؛ بلکې ځواکونو یې پر پرلت والو ډزې کړي چې مرګ ژوبله یې هم ورته اړولې ده.
په کابل کې د طالبانو واکمن رژیم که څه هم څو ځله د پاکستان د دغو قیوداتو مخالفت کړی، خو د یادو پرلتونو په اړه یې نظر نه دی ورکړی او له دې امله نیوکو سره مخ دی.