تاند (شنبه، د ثور ۱۵ مه ) یوې هندې ورځپاڼې، ټایمز اف انډیا د استخباراتي چارواکو له قوله راپور ورکړی چې په دې هېواد کې یې د افغانستان جنرال قونسلې ذکیې وردګ سره ۲۵ کیلوګرامه سره زر نیول شوي دي.
د یادې ورځپاڼې د معلوماتو له مخې، آغلې وردګ سره دغه سره زر هغه مهال ونیول شول چې له دوبۍ څخه هندوستان ته ستنېده.
ورځپانې د دې اندازې سرو زرو بیه ۱۸،۷ کروړه هندي کالدارې ښودلې او زیاتوي، پولیسو د ذکیې وردګ پر ضد د سرو زرو د قاچاق قضیه ثبت کړې ده.
ورځپاڼه لیکي، پېښه د اپریل په ۲۵مه شوې؛ خو نوموړې تر اوسه ځکه نهده نیول شوې چې ډیپلوماټیک مصوونیت لري.
د ټایمز اف انډیا د هند استخباراتي چارواکو ته د سپیناوي په اړه د ذکیې وردګ د بیان یوه برخه هم را اخیستې چې ویلي یې دي، په دې اړه حیرانه شوې او د پېښې د لا څېړنې غوښتنه یې کړې.
لا تر اوسه ذکیې وردګ او په هندوستان کې د افغانستان سفارت په دې اړه غبرګون نهدی ښودلی.
ذکیه وردګ د جمهوري نظام پر مهال د هندوستان په ممبيي کې د افغانستان جنرال قونسله ټاکل شوې وه.
هغه د جمهوري نظام له نسکوریدو او په هندوستان کې د افغانستان د سفارت د تړل کېدو له اعلان وروسته هم خپلې دندې ته دوام ورکړ او له ممبيي څخه سفارت ته لاړه چې د چارو سرپرستي او دوام پر غاړه واخلي.
د ذکیه وردګ مخالفانو هغه د طالبانو رژیم سره په معاملې تورنه کړې او ویلي، چې د هغې پلار د طالبانو د لومړني رژیم پر مهال هڅه کوله چې په واشنګټن کې د افغان دیپلومات په توګه طالب رژیم سره تعامل ولري.
ذکیه وردګ بیا طالبانو سره د معاملې تورونه رد کړي او ویلي وو، چې د افغانستان درې رنګه ملي بیرغ هسک ساتل غواړي او دندې ته دوام ورکوي.
متل ده وائی پیریانو ته غزني څه شئ ده. غربي لعنتي دموکراسۍ داسي لوبي په خلکو وکړې. لعنت په داسي ديپلوماته بیا په تیره بیا په ښځه . ای سوډرې دا د له کومه او په کومه وګټل؟😡