تاند (۴ شنبه، د ثور ۱۲ مه) په هرات کې پر شیعه لمونځ کوونکو، په یوه جومات کې د لمانځه پر مهال د اوړمې ورځې د خونړي برید مسوولیت د اسلامي دولت یا داعش ډلې خراسان څانګې پر غاړه اخیستی.
دې ډلې بیګا پر خپله ټلګرام پاڼه په یوه بیان کې دا اعلان وکړ. د هرات ولایت د ګذرې ولسوالۍ د شهرک سیمې په جومات کې پر لمونځ کوونکو د دوشنبې شپې د ډزو په پېښه کې لږترلږه اووه کسان ووژل شول.
په ورته وخت کې د هرات د شیعه عالمانو شورا له طالبانو غوښتي، چې د پېښې عاملان ژر معلوم او په سزا ورسوي.
په افغانستان کې د ملګرو ملتونو د سرمنشي ځانګړي دفتر( یوناما)، د پېښې په اړه د عاجلو پلټنو غوښتنه کړې ده.
په کابل کې د ایران او ترکیې سفارتونو او یو شمېر نورو دیپلوماتیکو مراجعو هم دا پېښه غندلې او د عاملانو د مجازات غوښتنه یې کړې ده.
دا پېښه داسې مهال شوې، چې د طالبانو د بهرنیو چارو وزیر ملا امیرخان متقي تېره اوونۍ له مشخص نوم اخیستو پرته د افغانستان ۳ ګاونډي هېوادونه د داعش ډلې په ملاتړ تورن کړل.
د طالبانو ځینو پلویانو بیا وویل، چې له دغو هېوادونو د متقي هدف پاکستان، ایران او تاجکستان هېوادونه دي.
په کابل کې د ایران سفیر حسن کاظمي قمي بیا وویل، چې دوی په افغانستان کې د داعش ډلې د ریښو له موجودیت څخه اندېښمن دي.