تاند(جمعه، د ثور ۷ مه) د خبریالانو بیلابیلو ډلو د طالبانو له بنده د درو تازه نیول شویو خبریالانو د خلاصون او د طالبانو له لوري پر رسنیو د بندیزونو د پای ته رسیدو غوښتنه کړې ده.
طالبانو له واک ته رسیدو وروسته په تدریجي ډول په افغانستان کې د بیان او رسنیو ازادۍ محدودې کړي.
د خبریالانو د خوندیتوب کمېټې، چې مرکز یې په نیویارک کې دی، پرون ناوخته په یوه بیان کې د اسماعیل سعادت، وحیدالله معصوم او احسان الله تسل د خوشي کېدو غوښتنه وکړه.
د خوست دا درې خبریالان د روانې اوونۍ د دوشنبې په ورځ د امربالمعروف او نهي عن المنکر ادارې له لوري ونیول شول چې لا هم بندیان دي.
د امریالمعروف له لوري دا درې تنه په دې خاطر نیول شوي چې ښځینه اورېدونکو ته یې ځواب ویلی او یا یې د اختر په ورځ موسیقي خپره کړې ده.
د طالبانو په واکمنۍ کې د راډیو او تلویزیون له لارې هم له ښځینه اوریدونکو سره خبرې ناروا دي.
د طالبانو د امربالمعروف ریاست رسنیو ته په استولي بیان کې ویلي چې په خوست کې یې دا درې خبریالان د «اسلامي امارت» د قوانینو د نه رعایتولو په جرم محکمې ته معرفي کړي دي.
طالبانو تر دې مخکې د بریا او نور په نومونو دوه تلویزیونونه د ملي او اسلامي ارزښتونو د نه رعایتولو په تور بند کړل.
د طالبانو له واک ته رسیدو وروسته شاوخوا نیمايي رسنۍ بندې شوي دي. زرګونه خبریالان له هیواده کډواله شوي دي.
د ډیرو کتونکو په باور دا ډله د بیان او رسنیو د ازادۍ په برخه کې په هغه پل، پل ږدي چې له نن څخه ۴۶ کاله پخوا په همدې ورځ (د ثور ۷ مه) اېښودل شوی و.
د ۱۳۵۷ د ثور د اوومې له کودتا وروسته هر هغه څوک چې له واکمن نظام سره هم نظره نه و، نیول کېده، شکنجه کېده او نهایتاً وژل کېده.
د نړۍ په هیوادونو کې د بشري حقونو د وضعیت په اړه د امریکا د بهرنیو چارو وزارت په وروستي راپور کې ویل شوي چې په افغانستان کې ۹۰ سلنه بندیان په سیاسي تورونو په زندان کې شپې ورځې تیروي.
د امربالمعروف چارواکي: خوست کې ۳ خبریالان موږ نیولي، محکمې ته یې بیایوو