تاند (چهارشنبه، د ثور ۵ مه) یو له هغو خوراکونو چې طبي څېړنې یې په اړه کله یو څه او کله بل څه وايي هګۍ دي.
یوه تازه څېړنه، چې په امریکا کې شوې د چرګې د هګۍ د خوراک ګټه دومره زیاته بلل شوې چې خلکو ته یې په ورځ کې د دوو هګیو د خوړولو سپارښتنه کړې ده.
په دې څېړنه کې، چې د امریکا د سترګو د روغتیا په علمي ژورنال کې خپره شوې ده، هګۍ له ویټامینونو او ضروري کاني موادو مالا مال بلل شوي دي.
د دوی په وینا، هګۍ د لوتیین او زاګزانتین په شان قوي انټي اوکسیډانونه لري چې د سترګو د روغتیا لپاره خورا حیاتي اهمیت لري.
په دې څېړنه کې څرګنده شوې چې انټي اوکسیډانونه د سترګو د هغو ناروغیو په مخنیوي کې مرسته کوي چې د ړندېدو سبب کېږي.
څېړنه ښيي چې که څوک دوه کاله د ورځې دوې هګۍ وخوري د ړندېدو خطر یې په سلو کې ۴۴ کم دی.